|
قارادری باراک اوباما و آغدری ابراهیم رشیدی ساوالان چیخدیلار / سید حیدر بیات
|
|
|
قئروو ۱۵, ۱۳۸۷
بو گون باراک اوباما آمئریکانین جمهور باشقانی سئچیلدی. عین گونده ابراهیم رشیدی ساوالان دا دوستاقدان چیخدی.
آمریکا و آوروپادا یاشایان قارالار یوز ایللر بویونجا دارتیشمالار سونراسی بو گون دونیادا گئرچک یئرلرینی تاپماغا دوغرو گئدیرلر. بلکه بونون چین کی اونلار باتیدا یاشاییرلار و باتی ان آزی دموکراسییانین بیر سیرا قوراللارینا باش اَییر. عین زاماندا شرق اؤلکهلرینده ائله بیل دونیا گئرییه دوغرو آددیم آتیر. اینسانلار دیل و مدنیت اوسته حدهلهنیب دوستاقلانیرلار. بو گون بو اینسانلاردان بیریسی دوستاقدان چیخمیشدی. نئچه دقیقه اونونلا مسینجیرده یازیشا بیلدیم. دئدیم یاخشی اولدو بَی، هاوالار سویویوب داها بوزسو یاپیشمازدی ایچریده. دئدی: ترسینه، من دئییرم یایدا ایشلهیک قیشدا گئدک ایچرییه.
سونرا دئدی: اوباما ایله بیرگه چیخدیق، آما او هارا، من هارا؟
ساوالانلا باشقا سؤزلرده دانیشدیق. او جملهدن او عالمالعلمای خلخالیدن، بختیشوعدن و ها بئله بئله بیلگی دونیاسینا عایید اولان آداملاردان سؤز آچدی و اونلارا عایید سورغولار سوروشدو. دوغروسو من جاوابلارینی بیلمهییردیم. اونا گؤره ده اونا: «تزه چیخیبسان گئت هله ائوده اوتور بیر چای ایچ عائیلهن ایله» دئدیم.
*
آذربایجان گنجلییی هر شئیدن آرتیق سورغولارینا جاواب گزیر. آزدیریجی و یالان جاوابلاردا اونو اینجیدیر. سورون ائله بورادان باشلانیر. هر دؤولت، هر قورال و سیستئم آذربایجاندا انسانیت، عدالت و دموکراسی چرچیوسینده حؤکوم سورمک ایستهسه بو سورغولارا دوزگون بیچیمده یانیت وئرمهلیدیر، بیلمهدییی سورغولارین دا جاوابینی تاپماغا ایمکان یاراتمالیدیر.
بویورون! بو آذربایجان گنجلیییدیر. دوستاقدان چیخان آندان بئله بیلگی و سورغولاری آردینجا گئتمهنی اونوتماییر. بیر ده او بیلیر کی بو گون جمهورباشقانی اولان باراک اوباما، دوننلرده اتوبوس ایچینده صندلی اوستونه اوتورماغا دا حاقی یوخایدی. |
|
جمعه هفدهم آبان 1387 |
|
|
| |
