زیندانلارا سیغمایاجاق قدر اؤزگور
(ابراهیم ساوالان فعالیتی اوزه رینه قیساجا بیر باخیش)
آیدین آزاد
دیلی تکجه ایلگی قورماق آراجی تک دوشونمک، دیلی آشاغیلاماقدان باشقا بیر شئی دئییل. ایلگی قورماق آراجینی حیوانلاردا دا گؤرمکده ییک. اصلینده ایسه عاغیل دا دیلدن آیری دئییل. دونیانی بیزه تانیدان و اونونلا ایلیشگی قورمامیزی دا دیل واسیطه سیله گؤروروک. بئله جه دوشونمه میزه گتیریب چیخاران دا دیل اولور. بیز دیل ایچینده یارانیریق، کیملیگیمیزین آختاریشینا چیخدیقدا، اؤزوموز اولماق ایسته دیک ده ، دیلده بونلارا چاتا بیلیریک. بئله اولدوقدا دیل کیملیگیمیزی آیدینلادیر. دیلیمیز کیملیگیمیز کیمی قبول ائدیلیر.
هر دیل باشقا بیر دونیا گؤروشودور. دیلین گلیشمه سینه مانع لیک تؤره دیریلرسه، او دیلده دونیا گؤروشو انگللنمیش اولار، دوشونجه دورغون حالینا گلر. بونو تام آیدینجاسینا گونئی آذربایجان دوروموندا گؤرمکده ییک. گونئی آذربایجان تورکجه سی انگلله ندییندن، میللی دوشونجه ده یانی سیرا انگللنمیشدیر. دیل میللت بیرلیینی ساغالدان اساس عامیلدیر. گونئی آذربایجان میللی حرکتینده آنا دیل اوغروندا دیرنمک ان منطیقلی چالیشمادیر.بونو ابراهیم ساوالانین فعالیتینده آیدین گؤروروک. ایران چرچیوه سینده یاشایان میللت لرین دیللری اوستونده چالیشما، میللت لرین چشیدلی دونیا گؤروشلرینی و اونلارین اؤزه ل دیرلرینی دیرچلتمک دئمکدیر.ابراهیم ساوالان " ایران میللت لری نین دیللری" آدلی قوردوغو کنگره ده، دیلین فلسفه سینه وارمیش و بو دوشونجه نی ائیلمه گتیرمیشدیر.
دیل همده اؤزگورلوکله یاخین بیر ایلگی ده دیر.دیل اینسانین دونیا گؤروشونو ساغلادیغینا گؤره، میللی اؤزگورلویوده ساغلامیش اولور. فرقلی خالقلارین دیلی ، چئشیدلی دونیا گؤروشودورسه ، میللتلر دیلسیز اؤزگورلویه چاتا بیلرلرمی گؤره ن؟ دیل دئییب دیره نرک آذربایجان میللتی نین حاقلارینی ساوونماق، آذربایجان اؤزگورلویو اوغروندا چالیشمادیر. ابراهیم ساوالان ، ایللردن بری اونیورسیته لرده، مختلیف شهرلرده دیل و تاریخ اؤیرتمنی اولاراق چالیشماسی ،میللتین لؤزگورلویو یولوندا چالیشماقدیر.
سؤزجوکلره یوکله نن تاریخیمیز، یاساقلانان دیلیمیز تک یاساقلانمیش. گونئی آذربایجان تاریخی نین تاریخ قولونو اساسا " پروفسور محمد تقی زهتابی" یه بورجلودور. زهتابی، ایسلام اونجه کی تاریخه گئنیش و اطرافلی یاناشماقلا آذربایجان میللتینی اممتچیلیکدن آییراراق میللت اولماسینا ، میللت تک فورمالاشماسینا گوجلو یاردیچی اولموش. تاریخیمیزین یانی سیرا دیلیمیزین ده کئشیینده دوران "پروفسور زهتابی" نین آذربایجان اوچون نه لر دوشوندویونو و نه ائتگیسی اولدوغونون تانیتیمیندا ابراهیم ساوالان، اورمودا "پروفسور زهتابی " کنگره سی قوراراق چالیشمیشدیر.
ابراهیم ساوالان یازیلاریندا منطقلی بیر گئدیش وار. اینسانلارین پریمیتیو حاقلاری محروم اولدوقدا و او اینسان بونون فرقینه وارمادیسا نه لر آیاقلانا بیله جه یینی "اؤز حاقلاریمیزی تانیمادیقدا" آدلی مقاله سینده یازمیش و بئله جّه حاقلاریمیزی ساوونماغا سسله ییر. اؤزونه مخصوص یازی اوسلوبو ایله یازیلمیش بو یازی ، ساده دیل و دولغون آنلامی ایله دیقتی چکمکده دیر. ساوالان بی یین یازیلاریندا دیقت چکن چوخ نکته لرله اوزله شیریک.
آرتیق بو گون ابراهیم ساوالان اورمو زیندانین دا ساخلانیلیرسا، مهدی نعیمی، مهندس راشدی، سعید موغانلی، مهندس صرافی تهران زیندانین دا دوستاقدیرلارسا ، کیملره سه باسقیلار آرتیریلیرسا، هئچ ده حرکت دورغون حالا گله سی دئییل. تاسوف کی یازیق آغالار گونئی آذربایجان میللی-آزادلیق حرکتی نین فلسفه سینی آنلاماق فیکرینده دئییللر. آرتیق دوستاقلاری آرتیرماق کئچرلی اولا بیلمز. هئچ بیر کیمسه میللی-آزادلیق حرکتی نین یارادیجیسی دئییل کی دوستاق ائتمکله حرکتی دورغون ائده بیله لر. دوستاقلیق، حرکتی اورتادان قالدیرماق آنلامیندا دوشولورسه، یانلیش دوشونجه دیر. گونئی آذربایجان میللی-آزادلیق حرکتی نین کؤکونو آنجاق آذربایجان میللتی نین دوروموندا تاپماق اولار، شخص لرده ئییل. بو گون حرکت آرتیق انگللنمه یه سیغمایاجاق قدردیر. داریسقال و قارانلیق زیندانلاردان اولدوقجا گئنیش و ایشیقلی.
من
بو دامدایام
سنگرداشیم او دامدا
قاپی لار قاپالی
گؤزلر یومولو
ائشیدیرم قاپی نین آچیلماسین
آپاریرلار سنگرداشیمی
گئجه دن گئجه یه
هله اؤلمه میشیک دئیه
دیریلیگیمیزی بیلمه یه
من
ساری بولبول اوخویورام
او
قارا گیله
بو دوواردان اوزاقدا
شن باهاری قارشیلایان یوردومون کؤیونده
قارا گیله گبه توخویور
کؤیشنینده
ساری بولبول اوخویور
ایندی اریکلر دویونله ییب
و یاماجلار
یام یاشیل ایپک بورویوب
اویاتمالییق قاراگیله نی
آل الوان ائتمه لییک
بو خارابا وطنی
( شئعر : ابراهیم ساوالان -" 85، قوچ، تبریز انفرادی سلولو")
